|
Statût de Associazion
Art. 1 – Constituzion
Si à constituide a Torin la Famèe Furlane, clamade
pal plui Fogolâr Furlan di Torin (organizazion non lucrative
di utilitât sociâl – ONLUS), associazion jenfri
i furlans ch’a son a stâ a Torin e te Provincie, cun
sît a Torin.
La associazion e à durade inlimitade e no à
finalitâts di profit. I contignûts e la struture de
Socie a son democratics.
Art. 2 – Finalitâts
Il Fogolâr, su la fonde dai principis de solidarietât
umane, a si propon:
di tignî unîts i furlans intune ugnule
famèe par che al stedi alt, tal spirt de "piçule
patrie" dal Friûl, il sintiment di fraterne fidance;
di promovi cun eficacitât la vite culturâl, tignint
vive tai asociâts la brame di valorizâ dut ce che ur
rivuarde, tal non e te nature dal furlan, in relazion cu l’amôr
e la cognossince in profont de lôr tiere;
di continuâ a mantignî, a doprâ e valorizâ
la lenghe furlane;
di stâur dongje ai iscrits, in mût che la famèe
e stedi dute e cun armonìe unide atôr dal çoc
antîc e gnûf;
di promovi manifestazions di caratar culturâl, sportîf,
dal timp libar e dal volontariât, adun cu la comunitât
e lis associazions locâls.
Dutis lis ativitâts davuelzudis dai socis e di chei che aderissin
a la "famèe furlane" a pro des finalitâts
indicadis tai paragrafs disore, a son prestazions personâls,
spontaneis e gratuidis.
Art. 3 – Risorsis economichis
Lis jentradis de Associazion a son constituidis
dal versament des cuotis sociâls de bande dai
socis, ch’al è di fâsi jenfri i 31 di març
di ogni an;
di jentradis ch’a rivin di ativitâts margjinâls
di comierç e produzion;
di eventuâls ereditâts, donazions e ogni altri versament
e/o contribût e/o erogazion, introit e sorevegnince ative
ch’a rivedin a la Associazion e ch’a’nd’an di
jessi doprâts a pro des finalitâts menzionadis lì
da l’art. 2 di chist Statût.
Lis jessidis a son constituidis di dutis lis spesis che la Associazion
e sostèn par meti in vore lis ativitâts statutariis.
Il patrimoni de Associazion al è constituît
da l’eventuâl font di casse, dai cespits e dai bens mobii
e inmobii acuisîts cun cualsisedi gjenar di jentradis, o tantche
ereditâts e donazions. Il patrimoni nol po’ jessi doprât
in maniere e par finalitâts diviersis di ce ch’al è
proviodût dal Statût, nì al po’ vignî
distribuît, dividût o dât a cualsisedi titul ai
socis intant de vite de Associazion stesse.
L’esercizi finanziari de Associazion al scomence
al prin di zenâr e a si siere ai 31 di dicembar di ogni an.
Art. 4 – La vôs dal Fogolâr di Torin
Il periodic dal titul La vôs dal Fogolâr di Torin al
è l’imprest di informazion e comunicazion viers i socis
e al à di contribuî a meti in vore lis finalitâts
de Associazion.
Art. 5 – Azion dai Socis
La azion de Associazion e di ducj i singui socis e jè apolitiche,
apartitiche e orientade solamentri a la pâs e al ben de comunitât
furlane di Torin e Provincie e dal Friûl in gjenerâl,
e a meti in vore lis finalitâts statutariis.
Art. 6 – I Socis
Si fâs distinzion fra Socis onoraris, ordenaris, simpatizants,
"agregâts", familiârs.
A son
Socis Onoraris chei che, fra i furlans, a si son particularmenrti
distints intai ambients sociâl, economic e culturâl,
e ch’a’nd’an pandût snait e dedizion a pro
dal progrès, de valorizazion e dal disvilùp de comunitât
furlane di Torin e Provincie e dal Friûl in gjenerâl;
Socis Ordenaris ducj i furlans ch’a son a stâ a Torin
e Provincie in regule cul pajament de cuote sociâl. Al è
"furlan" cui ch’al è nassût in Friûl
o al à divingnince furlane (fî o nevôt di furlans).
Al è "Friûl" il teritori storicamentri leât
a la lenghe, a la culture e a lis tradizions furlanis, sedi comprindût
te la Regjon Autonome Friûl-Vignesie Julie, sedi fûr
dai siei confins di cumò;
Socis Simpatizants chei che, ancje se no son furlans, seònt
judizi dal Consei Diretîf e daspò vê pajade la
cuote sociâl stabilide, a pandin interès e simpatie
pal Friûl, pe civiltât e pe culture furlanis, e che
a presèin lis ativitâts de Associazion, in condivision
dai siei obietîfs e des sôs finalitâts;
Socis "Agregâts" chei che, seònt judizi dal
Consei Diretîf e daspò vê pajade la cuote sociâl
stabilide, a si son tirâts dongje tantche grops di personis
o par specifichis ativitâts. Par chiscj sogjets a varan di
jessi stabilidis dal Consei Diretîf convenzions cu lis lôr
Associazions di partignince, seònt modalitâts e cuotis
definidis in specific;
Socis Familiârs i familiârs dai Socis Onoraris, dai
Socis Ordinaris, dai Socis Simpatizants e dai Socis "Agregâts",
individuâts tal grop familiâr o te famèe di fat
dai Socis menzionâts. La convivence e varà di risultâ
di une declarazion scrite. I Socis Familiârs a saran cosiderâts
socis dome se a varan pajât la cuote sociâl. A ducj
i efiets e par cualsisedi responsabilitât il Soci Onorari,
il Soci Ordenari, il Soci Simpatizant e il Soci "Agregât"
a’nd’an la cualifiche di "soci di riferiment"
par ducj i socis familiârs, ancje pes comunicazions ch’a
rivuardin lis ativitâts de Associazion.
La pierdite, par cualsisedi motîf, de cualifiche di Soci Onorari
e Soci Ordinari, di Soci Simpatizant e di Soci "Agregât",
e puarte dongje ancje la decadence a ducj i efiets di cualsisedi
cjarie eventualmentri tignude dal soci e la contemporanie decadence
de cualifiche di soci par ducj i relatîfs socis familiârs.
La domande di associazion, firmade di almancul doi
Socis ordinaris, e puarte dongje l’adesion a lis finalitâts
de Associazion e ai contignûts dal Statût.
Art. 7 – Criteris di amision dai Socis
La nomine dai Socis Onoraris e jè di competence de Samblèe
dai Socis su propueste dal Consei Diretîf. La acetazion des
domandis di associazion a Soci Ordinari, a Soci Simpatizant e a
Soci "Agregât" e jè di competence dal President,
sintût il Consei Diretîf.
L’inscrizion dai Socis Familiârs e jè
di competence de Segreterie.
La Segreterie e varà di tignî, an par
an, un elenc agjornât di ducj i Socis.
Art. 8 – Dovês dai Socis
I Socis a’nd’an di rispietâ chist Statût e
i Regolaments ch’a son eventualmentri metûts fûr.
I Socis a’nd’an ancje il dovê di puartâ in
dutis lis manieris il contribût onest e sincêr de lôr
inteligjence.
I Socis a scuegnin pajâ lis cuotis di inscrizion
jenfri il mês di març di ogni an, tes misuris definidis
dal Consei Diretîf e ratificadis de Samblèe dai Socis
inte sô prime sucesive reunion.
Cuant che un soci cul so compuartament al ofindi i
interès e i principis de Associazion o i fasi dam, al vegnarà
fidât dal Consei Diretîf al judizi dal Coleç
dai Probiviri. Là che la sô responsabilitât e
risulti provade, il soci al podarà jessi butât fûr
de Associazion.
In cualsisedi câs di jessìde de Associazion,
i Socis no podaran pratindi di vê indaûr la cuote di
inscrizion e/o cualsisedi altri lôr contribût dât
ae Sociazion, ni di vê ricognossude, a cualunchi titul, cuote
dal patrimoni sociâl.
Art. 9 – Derits dai Socis
Ducj i Socis a’nd’an il dirit, oltri a ce ch’al è
proviodût dal Statût e da lis disposizions di leç,
di intervignî a lis adunancis gjenerâls, di frecuentâ
il sît sociâl e di partecipâ a dutis lis manifestazions
organizadis.
A ducj i Socis ur vegnarà dade une tessare
di inscrizion a la Associazion seònt lis modalitâts
proviodudis dal Consei Diretîf.
Art. 10 – Derit di votâ
Ducj i socis in regule cul pajament de cuote di inscrizion pa l’an
in cors e par chel di prime a la Associazion a’nd’an il
derit di votâ in Samblèe .
Art. 11 – Cuote Sociâl
La cuote di inscrizion a la Associazion pal an e jè definide
dal Consei Diretîf e vegnarà ratificade de Samblèe
dai Socis inte sô prime sucesive reunion.
Art. 12 – Orghins de Associazion
Orghins de Associazion a son
la Samblèe Ordenarie e Straordenarie dai Socis;
il Consei Diretîf, elet de Samblèe;
il President, nomenât intal ambit dal Consei Diretîf;
il Coleç dai Revisôrs Contabii, ch’al starà
daûr ai conts de Associazion;
il Coleç dai Probiviri, ch’al sarà clamât
a disberdeâ cuestions di grande impuartance.
Art. 13 – La Samblèe
Ducj i socis menzionâts lì da l’articul 6, adun
in Samblèe, a sielzin i disevot components il Consei Diretîf,
dividûts in chiste maniere:
cuindis components jenfri i Socis Ordenaris;
un component jenfri i Socis Simpatizants;
un component jenfri i Socis "Agregâts";
A varan di jessi elets ancje
tre components il Coleç dai Revisôrs
Contabii;
tre components il Coleç dai Probiviri.
Ducj i Socis, in Samblèe, a’nd’an competence di
decidi eventuâls modifichis dal Statût
e/o eventuâi Regolaments de Associazion;
decidi su cualsisedi argoment che al vignidi presentât de
bande dal Consei Diretîf par jessi aprovât;
dâi aprovazion al belanç consuntîf e a chel preventîf
di ogni an su propueste dal Consei Diretîf.
Lis elezions a seguissin lis modalitâts definudis intun Regolament
eletorâl ch’al à di vê la aprovazion dal
Consei Diretîf e dal Coleç dai Probiviri e ch’a
i darà lis normis atuativis al Comitât Eletorâl
, sielzût dal Consei Diretîf almancul trente dîs
prime de Samblèe. La Samblèe e podarà riunîsi
daspò di un preavîs di almancul trente dîs.
Lis propuestis di modifiche dal Statût e/o di
eventuâi Regolaments internis e pal sfantament de Associazion
a son di competence dome
dai Socis Ordenaris;
dal Consei Diretîf, cun almancul i doi tierçs dai vôts
favorevui dai components in cjarie.
Art. 14 Il Consei Diretîf
Il Consei Diretîf, elet de Samblèe Gjenerâl dai
Socis ogni tre agns, al è l’orghin diretîf de
Socie e al sielç jenfri in siei membris
un President, ch’al represente la Socie viers
tierçs sogjets, metint la sô firme adun cun chê
dal Segretari su ducj i ats e presiedint a lis adunancis gjenerâls
e a lis reunions dal Consei ch’al convoche;
doi Vice-Presidents ch’a’nd’an i stes dovês
dal President, lu sostituissin cuant ch’al mancje, cun prioritât
pal plui vecjo dai doi;
un Segretari, ch’al à di firmâ, cuintrifirmâ
e conservâ intal sît de Associazion ducj i ats sociâi,
tignî protocòi e verbâi des adunancis gjenerâls
e des reunions dal Consei Diretîf, vê in custodie l’archivi
sociâl a ducj i altris ats ch’a coventin;
un Vice-Segretari, in jutori al Segretari;
un Tesaurîr, ch’al à di tignî i conts e
la gjestion aministradive de Associazion; al è responsabil
de gjestion dentri e fûr de Associazion, cence ecezions;
cuatri Diretôrs Organizatîfs par studiâ e meti
in vore ce ch’al rivuarde lis ativitâts davuelzudis tal
sît sociâl, ch’a son obleâts a riferî
al Consei Diretîf;
un Diretôr da La vôs dal Fogolâr;
siet Conseîrs par ativitâts e incarghis particulârs.
Il President, i Vice-Presidents, il Segretari, il ViceSegretari
e il Diretôr da La vôs dal Fogolâr a’nd’an
di jessi sielzûts jenfri i representants dai Socis Ordenaris.
Art. 15 - Coleç dai Revisôrs Contabii
Il Coleç dai Revisôrs Contabii, componût di tre
di lôr elets de Samblèe Gjenerâl dai Socis ogni
tre ains, al nomine jenfri i siei membris un President e al è
di sô competence
il control ministratîf e contabil su ducj i
ats di gjestion de Associazion;
la verifiche dal rispiet ministratîf des normis statutariis;
l’esam des propuestis di belanç e la verifiche che chistis
a sedin regolârs, cun relazions al Consei Diretîf e
a la Samblèe Gjenerâl dai Socis;
la verifiche periodiche de consistence de casse e de esistence dai
valôrs e dai bens di proprietât sociâl.
Art. 16 – Il Coleç dai Probiviri
Il Coleç dai Probiviri al è componût di tre
di lôr elets jenfri i Socis Ordenaris de Samblèe Gjenerâl
dai Socis ogni tre agns, al nomine jenfri i siei membris un President
e al è di sô competence
- cjapâ in esam eventuâls cuestions jenfri
i orghins de Associazion e presentâ lis sôs valutazions
al Consei Diretîf;
esprimisi su l’interpretazion dal Statût
e di eventuâi regolaments internis;
esprimisi su cualsisedi fat, ch’a i vegni presentât dal
Consei Diretîf par une sô valutazion;
funzionâ di comision permanent pe Revision dal Statût
e di eventuâi regolaments internis.
Art. 17 – Cjariis sociâls e incarghis variis
Dutis lis cjariis e lis incarghis proviodudis dal Statût e/o
atribuidis dal Consei Diretîf a son tignudis in maniere personâl,
spontanie e gratuide, cence finalitâts di profit, nancje indiret,
e esclusivamentri par solidarietât.
Ducj i membris dal Consei Diretîf a scuegnin
declarâ prime des votazions pes nomininis cualis ch’a
son lis incarghis ch’a crodin di rivâ a tignî e
il lôr program di ativitâts in relazion a la incarghe
e pal ben de Associazion.
I components dal Consei Diretîf, ognidun pe
so incarghe, a si impegnin cu l’acetazion de nomine a frecuentâ
cun regule lis reunions dal Consei e a fâ ce ch’a’nd
àn di fâ cun continuitât e snait.
E jè amitude la deleghe jenfri i Conseîrs.
Cuant che un Conseîr al mancji ai siei impegnis,
cjapâts cu l’acetazion de nomine, al ven esonerât
de cjarie seònt insindicabil judizi dal dal Consei Diretîf,
cu la votazion di almancul dodis Conseîrs, e al è eventualmentri
sostituît cul Soci ch’al à vût il numar
plui alt di vôts jenfri chei elezìbii escludûts
dal Consei; a paritât di numar di vôts, al ven elet
chel plui zovin di etât. In maniere compagne a si fasarà
in câs di dimisions di un Conseîr.
Art. 18 – Ce ch’al à di fâ
il Consei Diretîf
Il Consei Diretîf al à di
compilâ eventuâi regolaments internis,
che, par jessi operatîfs, a’nd’an di vê la
aprovazion de Samblèe Gjenerâl;
sielzi il Comitât Eletorâl, in ocasion des elezions
pe nomine dal Consei Diretîf, dal Coleç dai Revisôrs
Contabii e dal Coleç dai Probiviri;
dâi aprovazion al Regolament Eletorâl par meti in vore
dut ce ch’al è scrit culì disore;
prontâ lis propuestis e l’ordin dal dì di presentâ
a la Samblèe Gjenerâl;
aministrâ il partimoni de socie cun assolût rigôr
di coretece di metod;
presentâ a la Samblèe Gjenerâl, jenfri il mês
di març di ogni an, une relazion su lis ativitâts davuelzudis,
la situazion finanziarie de Associazion lis ativitâts proviodudis
pal an gnûf;
meti in vore lis deliberazions de Samblèe Gjenerâl;
sielzi comitâts speciâi pal studi di particulârs
argoments e problems;
abadâ a lis dibisugnis e a lis instancis dai socis in ducj
i câs di lôr specifichis richiestis.
Il Consei Diretîf al po’ metisi adùn dutis lis
voltis che il President o cinc dai siei components a lu domandin
e lis reunions a son validis cuant ch’a son presints almancul
dîs Conseîrs che a puedaran cjapâ decisions a
majorance assolude dai vôts dai components dal Diretîf.
Cuant che e jè paritât di vôt, chel dal President
al vâl dopli.
I components dal Coleç dai Revisôrs Contabii
a puedin jessi presints a lis reunions dal Consei Diretîf
e a puedin intervignî cuant che a si esaminèin belançs
preventîfs e consuntîfs, cence derit di votâ.
Ancje I components dal Coleç dai Probiviri
a puedin jessi presints a lis reunions dal Consei Diretîf
e a puedin intervignî, ma cence derit di votâ.
Art. 19 – Responsabilitât dai Conseîrs
Ognidun dai components il Consei Diretîf al rispuint in dut
de Socie al pari con ducj chei altris Conseîrs, sedi al singul
Soci che a la Samblèe.
Art. 20 – Samblèe dai Socis
La Samblèe gjenerâl ordenarie e à di jessi convocade
almancul une volte ad an, jenfri il mês di març, par
dâur aprovazion al belanç consuntîf da l’an
di prime, a chel preventîf e al program pa l’an gnûf.
L’avîs di convocazion al vegnarà dât fûr
almancul trente dîs prime de reunion a mieç de afision
di un cartel intai locâi dal sît sociâl e/o di
comunicazion cun curispuindince ordenarie.
Ogni Soci al po’ dâi a di un altri Soci
la deleghe par che lo representi lì das Samblèis.
No si po’ dâi plui di tre deleghis ad un medèm
Soci.
Art. 21 – Deliberazions de Samblèe
Lis deliberazions de Samblèe gjenerâl dai Socis a vegnin
fatis a majorance dai presints e par jessi validis a scuegnin jessi
prisints non mancul di un tierç dai Socis Ordenaris in prime
convocazion; lis deliberazions fatis in seconde convocazion, invezit,
a saran validis cun cualsisedi numar di presincis di Socis Ordinaris.
La Samblèe dai socis podarà jessi convocade
in seconde convocazion ancje te stesse dì de prime convocazion,
ma a distance di almancul dôs oris.
Art. 22 – Doprâ la lenghe furlane
Tes Samblèis, tes reunions instituzionâls e in dutis
lis ativitâts de Socie al è ben doprâ la lenghe
furlane sedi in forme orâl che tai scrits.
Art. 23 – Sfantament de Associazion
Il sfantament de Associazion al varà di jessi decidût,
cu la majorance di almancul i tre cuarts dai Socis Ordenaris presints
in prime convocazion e di almancul i doi tierçs dai Socis
Ordenaris presints in seconde convocazion, intune Samblèe
gjenerâl starordenarie convocade di pueste.
Intal câs che la Socie si sfanti, i bens eventualmentri
residuâi de licuidazion a vegnaran lassâts ad altris
oparis benefichis e di asistence cu lis medèmis finalitâts
de Associazion, di preference a Fogolârs di altris citâts
o a l’Ente Friuli nel Mondo, ch’al represente in gjenerâl
l’insiemit di ducj i Fogolârs, o ad altris ents o associazions
ch’a lavorin a pro de valorizazion de lenghe e de culture furlanis.
Art. 24 – Riferiment al Codiç Civîl
Par dut ce ch’a no l’è stât achì esplicitamentri
proviodut, a’nd’an valôr lis disposizions dal Codiç
Civîl o specifichis leçs in vigôr.
Test ch’al à vude aprovazion te Samblèe
Gjenerâl dai Socis in date 12 di jugn 1998.
Torin, ai 12 di jugn dal 1998.
Voltât in furlan di Marco Stolfo tal istât
dal 1998.
|
